OXFORD UNIVERSITY

ಆಕ್ಸ್ ಫರ್ಡ್ ವಿಶ್ವವಿದ್ಯಾಲಯ.

ನಾವು ಕಳೆದ ವರ್ಷ ಇಂಗ್ಲೆಂಡ್ ನಲ್ಲಿ ನಮ್ಮ ಮಗಳ ಮನೆಗೆ ಹೋಗಿದ್ದೆವು. ಅವಳು ವಾಸವಾಗಿರುವುದು ಲಂಡನ್ ಮಹಾನಗರದಿಂದ ಸುಮಾರು 400 ಕಿ.ಮಿ ದೂರದಲ್ಲಿರುವ ಕೋರ್ನ್ ವಾಲ್ ನ ಮುಖ್ಯ ಪಟ್ಟಣವಾದ ಟ್ರೂರೊದಲ್ಲಿ. ನಮ್ಮ ಅಳಿಯಂದಿರು ಇಲ್ಲೇ ಹಿರಿಯ ಡಾಕ್ಟರ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಕಳೆದ ಸೆಪ್ಟೆಂಬರ್ ನಲ್ಲಿ ಅವರಿಗೆ ಆಕ್ಸ್ ಫರ್ಡ್ ವಿಶ್ವ ವಿದ್ಯಾಲಯದಲ್ಲಿ ಒಂದು ಕಾನ್ಫರೆನ್ಸ್ ಇದ್ದುದರಿಂದ ಅಲ್ಲಿಗೆ ಹೋಗುವ ಸಂದರ್ಭ ಒದಗಿ ಬಂತು. ಅವರೊಂದಿಗೆ ನಾನು ಮತ್ತು ಕಸ್ತೂರಿ ಸಹಾ ಹೋಗಿದ್ದೆವು.

ಬೆಳಗ್ಗೆ 6 ಘಂಟೆಗೆ ನಮ್ಮ ಕಾರಿನಲ್ಲಿ ಹೊರಟ ನಮ್ಮನ್ನು ಅವರ ಸಹೋದ್ಯೋಗಿಗಳಿಬ್ಬರು ಕೂಡಿಕೊಂಡರು. ಸುಮಾರು 4 ½ ಘಂಟೆ ಪ್ರಯಾಣಿಸಿ ಆಕ್ಸ್ ಫರ್ಡ್ ತಲುಪಿದೆವು. ನಮಗೆ ಅಲ್ಲಿನ ಎಲ್ಲಾ ವಿವರಗಳನ್ನು ತಿಳಿಸಿ, ಸಂಜೆ 4 ಘಂಟೆಗೆ ಕಾರು ನಿಲ್ಲಿಸಿದಲ್ಲಿಗೆ ಬರಲು ಹೇಳಿ ಅವರ ವ್ಯೆದ್ಯಕೀಯ ವಿಭಾಗದ ಕಾಲೆಜ್ ಕಡೆ ಹೋದರು.  ನಾವಿಬ್ಬರು ಈ ಐತಿಹಾಸಿಕ ವಿದ್ಯಾನಗರವನ್ನು ನೋಡಲು ತೆರಳಿದೆವು.

ಈ ಮಹಾ ವಿಶ್ವವಿದ್ಯಾಲಯದ ಬಗ್ಗೆ ಸ್ವಲ್ಪ ಹೇಳದಿದ್ದರೆ ಈ ಬರಹ ಅಪೂರ್ಣವಾಗುತ್ತದೆ. ಇದನ್ನು ಸುಮಾರು 920 ವರ್ಷಗಳ ಹಿಂದೆ ಸ್ಥಾಪಿಸಿದರು. ಇಟೆಲಿಯ ವಿಶ್ವವಿದ್ಯಾಲಯದ ನಂತರ ಇದೇ ಅತ್ಯಂತ ಹಳೆಯ ಯೂನಿವರ್ಸಿಟಿಯಾಗಿದೆ. ಇಲ್ಲಿ ಒಟ್ಟು 38 ಪ್ರತ್ಯೇಕ ಕಾಲೆಜ್ ಗಳಿವೆ. ಇದಲ್ಲದೆ ಸುಮಾರು 70 ಕ್ಕೂಮಿಗಿಲಾದ ಸಂಶೋಧನಾ ಕೇಂದ್ರಗಳಿವೆ. ಎಲ್ಲದಕ್ಕೂ ಅದರದೇ ಆದ ನೀತಿ ನಿಯಮಾವಳಿಗಳಿದ್ದರೂ ಎಲ್ಲವೂ ಆಕ್ಸ್ ಫರ್ಡ್ ನ ನಿಬಂಧನೆಗಳಿಗೆ ಒಳಪಟ್ಟಿದೆ. ಇಲ್ಲಿ ಪದವಿ ಪೂರ್ವ ಹಾಗೂ ಪದವಿಗಳ ಎಲ್ಲಾ ವಿಷಯಗಳನ್ನು ಅಧ್ಯಯನ ಮಾಡುತ್ತಿರುವ 22000 ವಿದ್ಯಾರ್ಥಿಗಳಿದ್ದಾರೆ. ಜಗತ್ತಿನ ಎಲ್ಲಾ ದೇಶಗಳಿಂದ ಬಂದಿರುವ ವಿದ್ಯಾರ್ಥಿಗಳು ಇಲ್ಲಿದ್ದಾರೆ. ನಮ್ಮ ಭಾರತೀಯರೂ ಸಾಕಷ್ಟು ಮಂದಿ ಕಂಡುಬಂದರು. ಇಲ್ಲಿ ಕಲಿಯಲು ಯಾವುದೇ ರೀತಿಯ ಮೀಸಲಾತಿ, ವಶೀಲಿ, ದುಡ್ಡಿನ ಬಲ ಇನ್ನಿತರ ಅಡ್ಡದಾರಿಗಳು ನಡೆಯುವುದಿಲ್ಲ. ಅರ್ಹತೆಯೊಂದೇ ಇಲ್ಲಿ ಪ್ರಧಾನ. ಹಾಗಾಗಿ ಇಲ್ಲಿಂದ ಪದವಿ ಪಡೆದವರು ಉನ್ನತ ಮಟ್ಟವನ್ನು ತಲುಪುತ್ತಾರೆ. ನೊಬೆಲ್ ಪುರಸ್ಕಾರ ಪಡೆದವರಲ್ಲಿ ಸುಮಾರು 27 ಮಂದಿ ಇಲ್ಲಿ ಕಲಿತವರು. ಬ್ರಿಟನ್ನಿನ 26 ಮಂದಿ ಪ್ರಧಾನ ಮಂತ್ರಿಗಳು ಇಲ್ಲಿ ವ್ಯಾಸಂಗ ಮಾಡಿದವರು. ಜಗತ್ತಿನ ವಿವಿಧ ದೇಶಗಳ 30 ಮಂದಿ ಪ್ರಧಾನಿಗಳೂ, ಕವಿ, ಕಲಾಕಾರರೂ, ಕ್ರೀಡಾಪಟುಗಳು, ಆರ್ಥಿಕ, ನ್ಯಾಯ, ವ್ಯವಹಾರ, ಮಾಧ್ಯಮ, ವೈದ್ಯಕೀಯ, ವಿಜ್ನಾನ,  ಇಂಜಿನಿಯರಿಂಗ್, ವಾಣಿಜ್ಯ ಆರ್ಕಿಟೆಕ್ಟ್ ಮೊದಲಾದ ರಂಗಗಳಲ್ಲಿ ಪ್ರಖ್ಯಾತಿ ಪಡೆದವರು ಇಲ್ಲಿನ ವಿದ್ಯಾರ್ಥಿಗಳಾಗಿದ್ದಾರೆ. ನಮ್ಮ ಪ್ರಧಾನಿ ಶ್ರೀಮತಿ ಇಂದಿರಾ ಗಾಂಧಿ, ಮನಮೊಹನ ಸಿಂಘ್, ಸಿರಿಮಾವೋ ಬಂಡಾರ ನಾಯಕೆ. ಭುಟ್ಟೋ, ಬೇನಜೀರ್ ಭುಟ್ಟೋ, ಮನ್ಸೂರ್ ಆಲಿ ಖಾನ್ ಪಟೌಡಿ ಮತ್ತು ಇಮ್ರಾನ್ ಖಾನ್ ಎಲ್ಲರೂ ಇಲ್ಲಿ ಓದಿದವರು. ಜಗತ್ತಿನ ಯೂನಿವರ್ಸಿಟಿಗಳ ಪಟ್ಟಿಯಲ್ಲಿ ಇದು 5 ನೆಯ ಸ್ಥಾನದಲ್ಲಿದೆ.

ಇಲ್ಲಿನ ಪ್ರಮುಖ ಕಾಲೇಜುಗಳಲ್ಲಿ ಕ್ರೈಸ್ಟ್ ಕಾಲೆಜು, ಮೇರಿ ಮೆಗ್ದಲೀನ್, ಕ್ವೀನ್ಸ್, ಸೈಂಟ್ ಜೋನ್ಸ್, ಸೈಂಟ್ ಆನ್ಸ್, ಸೈಂಟ್ ಪೀಟರ್, ಟ್ರಿನಿಟಿ, ಸೈಂಟ್ ಆಂಟೊನಿ, ಬಲ್ಲಿಯೋಲ್, ಲಿಂಕನ್ ಮತ್ತು ವಧಾಮ್ ಕಾಲೇಜ್ ಗಳು ಹೆಸರುವಾಸಿಯಾಗಿವೆ. ಎಲ್ಲಾ ಕಾಲೆಜುಗಳಿಗೂ ಅದರದ್ದೇ ಆದ ಕೆಥೆಡ್ರಲ್, ಚರ್ಚ್, ಚಾಪೆಲ್ ಗಳಿವೆ. ಇಲ್ಲಿನ ಬಹುತೇಕ ಕಾಲೆಜ್ ಕಟ್ಟಡಗಳು ನೋಡಲು ಚರ್ಚ್ ನಂತಿದ್ದರೂ ಅವೆಲ್ಲವೂ ಕಾಲೆಜುಗಳೇ ಆಗಿವೆ. ಇಲ್ಲಿ ಹಲವಾರು ಮ್ಯೂಸಿಯಮ್ ಗಳು, ಲೈಬ್ರರಿಗಳು ಮತ್ತು ಪ್ರಸಿದ್ಧ ಆಕ್ಸ್ ಫರ್ಡ್ ಪ್ರೆಸ್ಸ್ ಇದೆ.

ನಾವು ಸ್ವಲ್ಪ ದೂರ ನಡೆಯುವಷ್ಟರಲ್ಲೇ ಉನ್ನತವಾದ ಕಂಭಗಳಿಂದ ರಾರಾಜಿಸುವ ಮುಖಮಂಟಪ ಹೊಂದಿದ ಬಹಳ ದೊಡ್ಡದಾದ ಲೈಬ್ರರಿ ಎದುರಾಯಿತು.

 ಇದು ಬೋಡ್ಲೀಯನ್ ಲೈಬ್ರರಿ. ಸರ್ ಥೋಮಸ್ ಬೋಡ್ಲಿ ಇದರ ಸಂಸ್ಥಾಪಕ. ಇಲ್ಲಿ 1617 ರಲ್ಲಿ ಕುಲಪತಿಯಾಗಿದ್ದ ಲೋರ್ಡ್ ವಿಲಿಯಂ ಹರ್ಬರ್ಟ್ ನ ಪುತ್ಥಳಿಯನ್ನು  ಒಳಾಂಗಣದಲ್ಲಿ ನಿಲ್ಲಿಸಿದ್ದಾರೆ.

 ಇದರ ಒಳಗಡೆ ಸಾಮಾನ್ಯ ಪ್ರವಾಸಿಗರಿಗೆ ಪ್ರವೇಶವಿಲ್ಲ. ಇದು ಸಹಜ, ಎಲ್ಲರೂ ಒಳಗೆ ಹೋಗಿ ಮಾತಾಡಿಕೊಂಡಿದ್ದರೆ ಅಭ್ಯಾಸ ಮಾಡುವವರಿಗೆ ತೊಂದರೆ ಆಗುತ್ತದಲ್ಲಾ.

ಒಂದು ಮಾತು- ಕಾಲೇಜಿನ ಒಳಗಡೆ ಹೋಗಬೇಕಾದರೆ ಪ್ರವೇಶಧನ ಕೊಡಬೇಕು. ನಮಗೆ ಇನ್ನೂ ಬಹಳ ನೋಡಲಿಕ್ಕಿದೆ. ಹಾಗಾಗಿ ಎಲ್ಲವನ್ನೂ ಹೊರಗಿಂದಲೇ ನೋಡಿ ಫೋಟೊ ಹಿಡಿದು ತೃಪ್ತಿ ಪಟ್ಟೆವು.

 ಇದರ ಪಕ್ಕದಲ್ಲಿರುವ ಇನ್ನೊಂದು ಕಟ್ಟಡ, ರಾಡ್ ಕ್ಲಿಫ್ ಕೆಮರಾ, ಇದು ವಾಚನಾಲಯ.

 ಅಂತಹುದೇ ಇನ್ನೊಂದರಲ್ಲಿ  ಪದವಿ ಪ್ರಧಾನ, ಮತ್ತಿತರ  ಕಾರ್ಯಕ್ರಮಗಳು ನಡೆಯುವುದು. ಇದು ಶೆಲ್ ಡೊನಿಯನ್ ಥಿಯೇಟರ್.

 ಲೈಬ್ರರಿಯ ಒಂದು ಪಕ್ಕದಲ್ಲಿ ಯೂನಿವರ್ಸಿಟಿ ಚರ್ಚ್ ಇದೆ.

 ಅಲ್ಲಿ ನಮಗೆ ಎದುರಾದ ಒಬ್ಬ ಮಹನೀಯರಲ್ಲಿ ವಿಚಾರಿಸಿ ಕ್ರೈಸ್ಟ್ ಚರ್ಚ್ ಕಾಲೆಜಿನ ಕಡೆಗೆ ಹೋದೆವು. ಬಹಳ ಸುಂದರವಾದ ಮಹಾದ್ವಾರ ಹಾಗೂ ಗೋಪುರವನ್ನು ಒಳಗೊಂಡಿದೆ.

 ಅದನ್ನು ಹೊಕ್ಕು ಮುಂದೆ ವಿಶಾಲವಾದ ಸುಂದರ ಹುಲ್ಲು ಹಾಸು ಮತ್ತು ಉದ್ಯಾನವನ್ನು ಹಾದು ನಾವು ಕಾಲೇಜಿನ ಎದುರು ಬಂದೆವು.

ಇದು ಕಾಲೆಜ್ ಮಾತ್ರವಲ್ಲ ಒಂದು ಅಪೂರ್ವ ಕೆಥೆಡ್ರಲ್ ಸಹಾ ಒಳಗೊಂಡಿದೆ. ಬಹಳ ಭವ್ಯ ಕಟ್ಟಡಗಳು. ಕಾಲೇಜಿನ ಭೋಜನ ಗೃಹವಂತೂ ಊಹಿಸಲಾಗದಷ್ಟು ಬೃಹತ್ತಾಗಿದೆ. ಇಲ್ಲೇ ಹ್ಯಾರಿ ಪೋಟರ್ ಸಿನಿಮಾದ ಕೆಲ ದೃಶ್ಯಗಳನ್ನು ಚಿತ್ರೀಕರಿಸಲಾಗಿತ್ತು. ನಾವು ಕಾಲೇಜಿನ ಪಾವಟಿಕೆಗಳನ್ನು ಏರಿ ಫೊಟೋ ತೆಗೆದುಕೊಂಡೆವು. ಅದೆಷ್ಟು ಮಾಹಾನುಭಾವರುಗಳು ಈ ಮೆಟ್ಟಲುಗಳನ್ನು, ಈ ನೆಲವನ್ನು ತುಳಿದಿದ್ದರೋಎಂದು ಯೋಚಿಸುವಾಗ ಮನ ಪುಳಕಿತವಾಯಿತು. ಅಂತೂ ನಾವೂ ಒಮ್ಮೆ ಆಕ್ಸ್ ಫರ್ಡ್ ಮೆಟ್ಟಲು ಏರಿದೆವು ಎಂಬ ಮಿತ್ಯಾನಂದ ಪಡೆದೆವು!

ಇಲ್ಲೇ ಸ್ವಲ್ಪ ದೂರದಲ್ಲಿ ಮೆಗ್ದಲೀನ್ ಕಾಲೆಜ್ ಇದೆ. ಇದು ಸಹಾ ಬಹಳ ದೊಡ್ಡದಿದ್ದು ಸುಂದರವಾಗಿದೆ. ಇನ್ನೂ ಹಲವಾರು ಕಾಲೇಜುಗಳು ಅಕ್ಕ ಪಕ್ಕದಲ್ಲಿ ಇವೆ. ನಾವು ದೂರದಿಂದಲೇ ಫೊಟೊ ಹಿಡಿದು ಸಾಗುತ್ತಿದ್ದೆವು.

 ಈವಾಗ ನಾವು ಇಲ್ಲಿನ ಮುಖ್ಯ ರಸ್ತೆಗೆ ಬಂದೆವು. ಇಲ್ಲಿ ಬಹಳಷ್ಟು ಮಾಲ್ ಗಳೂ ಶೋರೂಂಗಳೂ ಅಂಗಡಿಗಳೂ ಇವೆ. ಚಿತ್ರಮಂದಿರ, ಬ್ಯಾಂಕ್ ಇನ್ನಿತರ ಆಪೀಸುಗಳು ಹೋಟೆಲ್ ಇತ್ಯಾದಿಗಳು ಇವೆ. 

ಇಲ್ಲಿನ ಬಸ್ಸುಗಳು ಬಹಳ ಸುಂದರವಾಗಿವೆ. ವಿದ್ಯಾರ್ಥಿಗಳು ಹೆಚ್ಚಾಗಿ ಬಳಸುವುದು ಸೈಕಲ್. ಬೈಕುಗಳು ಇಲ್ಲವೇ ಇಲ್ಲ.

ನಾವು ಅಲ್ಲಿರುವ ಸೈನ್ಸ್ ಬರಿಯಿಂದ ಬರ್ಗರ್, ಹಣ್ಣುಗಳು ಮತ್ತು ಜ್ಯೂಸ್ ಕೊಂಡು ಪಕ್ಕದಲ್ಲೇ ಇರುವ ಪಾರ್ಕ್ ನಲ್ಲಿ ಕುಳಿತು ಹಸಿವು ನಿವಾರಿಸಿಕೊಂಡೆವು. ಆಮೇಲೆ ಸ್ವಲ್ಪ ವಿಶ್ರಾಮ.

ಮುಂದೆ ನಡೆದಾಗ ಅಲ್ಲಿನ ಪುರ ಭವನ ಕಂಡೆವು. ನಂತರ ಅಲ್ಲಿನ ಸಿಟಿ ಹಾಲ್ ಎಲ್ಲಾ ನೋಡಿಕೊಂಡು ಆಕ್ಸ್ ಫರ್ಡ್ ನ ಇನ್ನೊಂದು ಭಾಗಕ್ಕೆ ತಲುಪಿದೆವು. ಇಲ್ಲಿ ಮೆಡಿಕಲ್, ಎಂಜಿನೀಯರಿಂಗ್, ಕಂಪ್ಯೂಟರ್ ಮತ್ತು ಆರ್ಕಿಟೆಕ್ಚರ್ ಮತ್ತು ವಿಜ್ನಾನ ವಿಭಾಗಗಳಿವೆ. ಎಲ್ಲವೂ ಅದೇ ಹಳೆಯ ಶೈಲಿಯ ಕಟ್ಟಡಗಳು. ಇವುಗಳನ್ನು ನೋಡುವುದೇ ಒಂದು ಆನಂದ.

ಇಲ್ಲಿಯೇ ನಮಗೆ ನ್ಯಾಚುರಲ್ ಹಿಸ್ಟರಿ ಮ್ಯೂಸಿಯಂ ಎದುರಾಯಿತು. ಹಿಂದೊಮ್ಮೆ ಲಂಡನ್ ನಲ್ಲಿನ ಮ್ಯೂಸಿಯಂ ನೋಡಿದ್ದ ನಮಗೆ ಇದರೊಳಗೆ ಹೋಗುವ ಕುತೂಹಲ ಆಗಲಿಲ್ಲ.

ಘಂಟೆ 4 ಆಯಿತು. ನಾವು ಕಾರಿನೆಡೆಗೆ ಬಂದೆವು. ರೋಹಿತ್ ಮತ್ತಿಬ್ಬರು ಸಹಾ ಬಂದಿದ್ದರು. ಅಲ್ಲಿಂದ ಹೊರಟೆವು. ದಾರಿಯಲ್ಲಿ ಸ್ವಲ್ಪ ಉಪಹಾರ, ಕಾಫಿ ಸೇವಿಸಿ ಮುಂದೆ ಪಯಣಿಸಿದೆವು. ನಮ್ಮೊಂದಿಗೆ ಬಂದಿದ್ದ ಇಬ್ಬರನ್ನೂ ಅವರವರ ಮನೆಗೆ ತಲುಪಿಸಿ ನಾವು ಮನೆಗೆ 9 ಘಂಟೆಗೆ ತಲುಪಿದೆವು.

ಊಟ ಮುಗಿಸಿ ಮಲಗಿದ ನಮಗೆ ನಿದ್ರೆ ಬರುತ್ತಿಲ್ಲ. ಕಣ್ಣಲ್ಲಿ ಆಕ್ಸ್ ಫರ್ಡ್ ನ ಭವ್ಯ ಕಾಲೆಜುಗಳ ನೋಟಗಳೇ ತುಂಬಿ ಬರುತಿತ್ತು.

ಮೇಲೆ ಹೇಳಿರುವ ಕೆಲ ಅಂಕಿ ಅಂಶಗಳನ್ನು ಗೂಗಲ್ ವಿಕಿಪೀಡಿಯಾದಿಂದ ಪಡೆದಿದ್ದೇನೆ.    

                                                                                                                                                                                                               

    

KAANCHIPURAM

ಕಾಂಚೀಪುರ

ನಾವು ಇದೇ ಆಗಸ್ಟ್ ತಿಂಗಳಲ್ಲಿ ಕಾಂಚೀಪುರ ಯಾತ್ರೆ ಕೈಗೊಂಡಿದ್ದೆವು. ಬೆಂಗಳೂರು ಸಿಟಿ ರೈಲುನಿಲ್ದಾಣದಿಂದ ಕಾವೇರಿ ಎಕ್ಸ್ಪ್ರೆಸ್ಸ್ ರೈಲಿನಲ್ಲಿ ಬುಕ್ ಮಾಡಿದ್ದೆವು. ರಾತ್ರಿ 11.30 ಕ್ಕೆ  ನಮ್ಮ ಗಾಡಿ ಮೈಸೂರಿನಿಂದ ಬಂದು ತಲುಪಿತು. ನಾವು ಅದರಲ್ಲಿ ಹತ್ತಿ ಆರಾಮವಾಗಿ ನಿದ್ರೆ ಮಾಡಿ ಮುಂಜಾನೆ 6 ಘಂಟೆಗೆ ಆರ್ಕೋಣಂ ತಲುಪಿದೆವು. ಅಲ್ಲಿ ಇಳಿದು ಒಂದು ಆಟೋ ಮಾಡಿಕೊಂಡು ಅಲ್ಲಿನ ಬಸ್ ಸ್ಟ್ಯಾಂಡ್ ಗೆ ಬಂದು, ಆಗಲೇ ಹೊರಡಲು ತಯಾರಾಗಿದ್ದ ಖಾಸಗಿ ಬಸ್ಸು ಏರಿದೆವು. ರಶ್ ಏನೂ ಇರಲಿಲ್ಲ. ಬಸ್ಸು ಸರಿಯಾಗಿ 7.10ಕ್ಕೆ, 30 ಕಿ.ಮಿ ದೂರವಿರುವ ಕಾಂಚೀಪುರಂ ತಲುಪಿತು.

ಕಾಂಚೀಪುರಂ-ಕಂಚಿ-ಕಾಂಜೀವರಂ ಎಂದೆಲ್ಲಾ ಈ ಪಟ್ಟಣವನ್ನು ಹೆಸರಿಸುತ್ತಾರೆ. ದೇವಾಲಯಗಳ ಊರು, ರೇಶ್ಮೆಸೀರೆಗಳಿಗೆ ಪ್ರಸಿದ್ದವಾದ ನಾಡು, ಪಲ್ಲವ ರಾಜರ ರಾಜಧಾನಿ ಆಗಿತ್ತು. ಶಂಕರಾಚಾರ್ಯರು ಸ್ಥಾಪಿಸಿದ್ದ 4 ಆಮ್ನಾಯಗಳಲ್ಲಿ ಒಂದಾದ ಕಾಂಚಿ ಪೀಠ ಇಲ್ಲಿದೆ. ಅವರೇ ಇಲ್ಲಿ ಶ್ರೀಚಕ್ರವನ್ನು ಪ್ರತಿಷ್ಟೆ ಮಾಡಿ, ಪಾರ್ವತಿಯ ಇನ್ನೊಂದು ರೂಪವಾದ ಕಾಮಾಕ್ಷಿ ದೇವರನ್ನು ಪ್ರತಿಷ್ಟೆ ಮಾಡಿದರು. ಇಲ್ಲಿ ಕಾಮಾಕ್ಷಿ ಅಮ್ಮನ ದೊಡ್ಡದಾದ ದೇವಾಲಯವಲ್ಲದೆ ಏಕಾಂಬರನಾಥ, ಕೈಲಾಸನಾಥ, ಕರ್ಛಪೇಶ್ವರ, ಸುರಗೀಶ್ವರ, ಉಳಗಲನಾಥ, ಕುಮರಕೊಟ್ಟಂ, ಪಾಂಡವ ದೂತರ್ ಪೆರುಮಾಳ್ ಮತ್ತು ವರದರಾಜ ಪೆರುಮಾಳ್ ಮಂತಾದ ವಿಶಾಲವಾದ ದೇವಾಲಯಗಳಿವೆ. ಕಂಚಿ ಕಾಮಕೋಟಿ ಜಗದ್ಗುರು ಸಂಸ್ಥಾನ ಸಹಾ ಇಲ್ಲಿದೆ. ಕಾಂಚೀಪುರವನ್ನು 4 ರಿಂದ 9 ನೇ ಶತಮಾನದವರೆಗೆ ಪಲ್ಲವರು ತಮ್ಮ ರಾಜಧಾನಿಯನ್ನಾಗಿ ಮಾಡಿಕೊಂಡು ಆಳುತ್ತಿದ್ದರು. ನಂತರ ಚೋಳರು, ಪಾಂಡ್ಯರು, ವಿಜಯನಗರದ ಅರಸರು ಆಳಿದರು. ಕೆಲಕಾಲ ಮುಸ್ಲಿಮರು, ನಾಯಕರು ಮತ್ತು ಕೊನೆಗೆ ಆಂಗ್ಲರ ಆಳ್ವಿಕೆಗೆ ಒಳಪಟ್ಟಿತ್ತು. ಕಾಂಚಿ ಒಂದು ಟೂರಿಸ್ಟ್ ಕೇಂದ್ರವಾಗಿದ್ದುದರಿಂದ ಸಾಕಷ್ಟು ಹೊಟೆಲ್ ಮತ್ತು ಉಪಹಾರ ಮಂದಿರಗಳೂ ಇವೆ. ಪಟ್ಟಣವೂ ಚೆನ್ನಾಗಿದೆ. ಇಲ್ಲಿಂದ ಚೆನ್ನೈ ಗೆ 72 ಕಿ.ಮಿ ದೂರ.

ನಾವು ಬಸ್ ಇಳಿದು ಅನತಿ ದೂರ ನಡೆದು ಹೋಟೆಲ್ ಗೆ ಹೋಗಿ ಉಪಹಾರ ಮುಗಿಸಿ ಪಕ್ಕದಲ್ಲೆ ಇರುವ ಕಾಮಾಕ್ಷಿ ದೇವಾಲಯಕ್ಕೆ ಹೋದೆವು. ಮೊದಲು ನಮಗೆ ಅಲ್ಲಿನ ಕಲ್ಯಾಣಿ ಕಾಣುತ್ತದೆ.

 ಅದನ್ನು ಬಳಸಿಕೊಂಡು ಹೋದಾಗ ಒಂದು ಮಂಟಪ ಕಾಣುತ್ತದೆ. ಪಕ್ಕದಲ್ಲೇ ಗಜ ಶಾಲೆ. ಇಲ್ಲಿ 3 ಆನೆಗಳಿದ್ದವು.

 ಮುಂದೆ ದೇವಾಲಯದ ಪ್ರಾಕಾರ ಮತ್ತು ನಾಲ್ಕೂ ದಿಕ್ಕಿನಲ್ಲಿ ಗೋಪುರಗಳೂ ಮಧ್ಯದಲ್ಲಿರುವ ಗೋಪುರವೂ ಕಾಣುತ್ತದೆ. ಈ ನಾಲ್ಕೂ ಗೋಪುರಗಳಿಗೂ ದುರಸ್ಥಿಗಾಗಿ ಅಟ್ಟಳಿಗೆ ಕಟ್ಟಿರುವುದರಿಂದ ಅಷ್ಟು ಚೆನ್ನಾಗಿ ತೋರುವುದಿಲ್ಲ.

ನಾವು ಒಳಗಡೆ ಹೋಗಿ ದೇವರ ದರ್ಶನ ಮಾಡಿದೆವು. ಪದ್ಮಾಸನದಲ್ಲಿ ಕುಳಿತ ದೇವಿಯ ಮೂರ್ತಿ ಬಹಳ ಚೆನ್ನಾಗಿದೆ. ಆವತ್ತು ರಶ್ ಇಲ್ಲದಿದುದರಿಂದ ತುಂಬಾ ಹೊತ್ತು ಅಲ್ಲೇ ನಿಂತಿದ್ದೆವು. ಪ್ರಸಾದ ಸ್ವೀಕರಿಸಿ ಹೊರ ಬಂದೆವು.

ಅಲ್ಲೇ ವಿಚಾರಿಸಿದಾಗ ಪಕ್ಕದಲ್ಲೇ ಉಳಗಲಾನಂದ ದೇವಾಲಯವಿದೆ ಎಂದು ತಿಳಿಯಿತು.

 ಅಲ್ಲಿ ನಾವಲ್ಲದೆ ಬೇರೆ ಯಾರೂ ಭಕ್ತರಿರಲಿಲ್ಲ. ಇಲ್ಲಿನ ದೇವರು ತ್ರಿವಿಕ್ರಮ. ಮಹಾವಿಷ್ಣುವಿನ ವಾಮನಾವತಾರಕ್ಕೆ ಸಂಬಂಧಿಸಿದ ದೇವಾಲಯ. ಚಿಕ್ಕ, ಚೊಕ್ಕದಾದ ದೇವಸ್ಥಾನ. ಇಲ್ಲಿನ ಪ್ರಶಾಂತತೆ ನಮಗೆ ಬಹಳ ಇಷ್ಟವಾಯಿತು.

ಇಲ್ಲಿಂದ ಮುಂದಿನ ರಸ್ತೆಯಲ್ಲಿ ಸಾಗಿದರೆ ಇನ್ನೊಂದು ಆಲಯ ಸಿಗುತ್ತದೆ. ಇದು ಪಾಂಡವ ದೂತರ್ ಪೆರುಮಾಳ್ ದೇವಾಲಯ. ಪಾಂಡವ ದೂತನಾಗಿ ಶ್ರೀಕೄಷ್ಣ ಕೌರವರಲ್ಲಿಗೆ ಹೊಗಿದ್ದ. ಅಂತೆಯೇ ಇದು ಶ್ರೀಹರಿಯ ದೇವಾಲಯ.

 ಇಲ್ಲೂ ಅಷ್ಟೆ, ಜನಗಳೇ ಇರಲಿಲ್ಲ. ಇದರ ಶಿಖರ ಬೇರೆಯೇ ರೀತಿಯಾಗಿದ್ದು ನೋಡಲು ಸುಂದರ ವಾಗಿದೆ. ನಮ್ಮ ಪುಣ್ಯಕ್ಕೆ ಮೋಡ ಕವಿದ ವಾತಾವರಣವಿದ್ದು ಸೆಕೆ ಅನ್ನಿಸಲೇ ಇಲ್ಲ.

ಸ್ವಲ್ಪ ಮುಂದೆ ಹೋದಾಗ ಕಂಚಿ ಕಾಮಕೋಟಿ ಮಠ ಸಿಗುತ್ತದೆ.

 ಅದರ ಪಕ್ಕದಲ್ಲೇ ಕುಮರಕೊಟ್ಟಂ ಮುರುಗನ್ ದೇವಾಲಯವಿದೆ. ಇವುಗಳನ್ನು ಆಮೇಲೆ ನೊಡಬಹುದು ಎಂದು ನಾವು ಮುಂದೆ ಸಾಗಿದಾಗ ಒಂದು ಪುಟ್ಟ ದೇಗುಲ ಕಾಣಿಸಿತು.

 ಇದು ಬಹಳ ಹಳೆಯ ಕಾಲದ 6ನೇ ಶತಮಾನದ ಪಲ್ಲವರ ಕಾಲದ ಆಲಯ. ಇಲ್ಲಿನ ದೇವರು ಸುರಗೀಶ್ವರ.  ಚಿಕ್ಕದಾದರೂ ಸುಂದರವಾಗಿದೆ. ತುಂಬಾ ಕೆತ್ತನೆಗಳಿವೆ. ಇದರ ಶಿಖರ ಮಾತ್ರ ಕೆಲವೆಡೆ  ಹಾಳಾಗಿದೆ. ಪ್ರಾಕ್ತನ ಇಲಾಖೆಗೆ ಸೇರಿದ್ದಾಗಿದೆ. ಒಳಗಡೆ ಹೋಗಿ ಶಿವನನ್ನು ಕಂಡು ನಮಿಸಿ ಹೊರಬಂದೆವು. ಇಲ್ಲಿಂದ ಸ್ವಲ್ಪವೇ ಮುಂದೆ ಇರುವ  ಏಕಾಂಬರನಾಥ ದೇವಾಲಯಕ್ಕೆ ಹೋದೆವು. ದೂರದಿಂದಲೇ ಬೄಹತ್ತಾದ ಭವ್ಯ ಗೋಪುರ ಕಾಣುತ್ತದೆ. ಅಲ್ಲೆಲ್ಲಾ ವಿವಿಧ ವಾಹನಗಳೂ ಟೂರಿಸ್ಟ್ ಬಸ್ಸುಗಳೂ ನೆರೆದಿದ್ದವು. ಎರಡೂ ಪಕ್ಕದಲ್ಲಿ ಬಟ್ಟೆ ಅಂಗಡಿಗಳ ಸಾಲು, ಹೂ ಹಣ್ಣು ಮತ್ತು ರೆಡಿ ಮೇಡ್ ಉಡುಪು ಮಾರುವ ತಳ್ಳು ಗಾಡಿಗಳು ತುಂಬಿದ್ದವು.

 ನಾವು ಗೋಪುರದ ಎದುರಿಗೇ ಬಂದೆವು. ಇದರ ಎತ್ತರ ಸುಮಾರು 200 ಅಡಿ ಇರಬಹುದು. ಒಟ್ಟು 9 ಅಂತಸ್ತು ಇದೆ. ಮೇಲೆ ಕಳಶಗಳ ಸಾಲು. ಚಂದನ ವರ್ಣದಲ್ಲಿ ಬಹಳ ಸುಂದರವಾಗಿ ಕಾಣುತ್ತದೆ. ಇದರಲ್ಲಿ ಮೂರ್ತಿಗಳಾಗಲೀ ಇನ್ನಿತರ ಅಲಂಕಾರಿಕ ಗೊಂಬೆಗಳಿಲ್ಲ. ಮದುರೈನಲ್ಲಿರುವಂತೆ ನಮ್ಮನ್ನು ಗಲಿಬಿಲಿಗೊಳಿಸುವಂತಹಾ ನೋಟ ಇದರಲ್ಲಿಲ್ಲ.

 ಇಂತಹ 4 ಗೋಪುರ ಇಲ್ಲಿವೆ. ಈ ಗೋಪುರಕ್ಕೆ ಹೊಂದಿಕೆಯಾಗುವಂತಹ ದೊಡ್ಡ ಮಹಾ ದ್ವಾರ.

 ಇದನ್ನು ಹೊಕ್ಕು ಆ ಕಡೆ ಬಂದಾಗ ವಿಶಾಲವಾದ ಅಂಗಣ, ಅದರಲ್ಲಿ ಒಂದು ರಥ ಕೊಟ್ಟಿಗೆ ಎದುರಿಗಿದೆ.

 ಅಲ್ಲಿಂದ ಮುಂದೆ ಒಂದು ಗೇಟ್, ಇದರಲ್ಲಿ ಮುಂದೆ ಹೋದರೆ ಮತ್ತೂ ವಿಶಾಲವಾದ ಜಾಗವಿದೆ. ಮಧ್ಯದಲ್ಲಿ ಏಕಾಂಬರನಾಥ ದೇವಾಲಯ. ಎತ್ತರವಾದ ಶಿಖರ, ಮುಖ ಮಂಟಪ, ಒಳಾಂಗಣ ಮತ್ತು ಗರ್ಭಗುಡಿ ಇದೆ.

ಮುಖ ಮಂಟಪದಲ್ಲಿ ತುಂಬಾ ಸ್ಥಂಭಗಳಿದ್ದು ನಾನಾ ಮೂರ್ತಿಗಳನ್ನು ಕೆತ್ತಿದ್ದಾರೆ. ಇದರಲ್ಲಿ ಎದುರುಗಡೆ ನಂದಿ ವಿಗ್ರಹವಿದೆ. ಬಲಿಕಲ್ಲು ಮತ್ತು ದ್ವಜಸ್ತಂಭವಿದೆ.

 ಇದರ ಒಂದು ಪಕ್ಕದಲ್ಲಿ ದೊಡ್ಡದಾದ ಕಲ್ಯಾಣಿ ಇದೆ. ಇದರ ಮಧ್ಯದಲ್ಲಿ ಒಂದು ಸುಂದರ ಮಂಟಪವಿದೆ.

 ಸ್ವಲ್ಪ ದೂರದಲ್ಲಿ ಒಂದು ಗಣಪನ ವಿಗ್ರಹ ಇರಿಸಿದ್ದಾರೆ. ಅದು ಭಿನ್ನಗೊಂಡಿರುವ ವಿಗ್ರಹವಾದ್ದರಿಂದ ಹೊರಗಡೆ ಇರಿಸಿದ್ದಾರೆ.

 ಮುಂದಿನ ದ್ವಾರದಲ್ಲಿ ಹೋದರೆ ಒಳಾಂಗಣ ಸಿಗುತ್ತದೆ. ಇಲ್ಲಿನ ಕಂಭಗಳಲ್ಲಿನ ಕೆತ್ತನೆ ಕೆಲಸ ಬಹಳ ಸುಂದರವಾಗಿದೆ. ಇದರ ಎಡ ಪಕ್ಕದಲ್ಲಿ ಶಿವಲಿಂಗಗಳ ಸಾಲು.

 ಇನ್ನೊಂದು ಪಕ್ಕದಲ್ಲಿ ದೇವರ ಉತ್ಸವಕ್ಕೆ ಬಳಸುವ ವಿವಿಧ ವಾಹನಗಳು ಇವೆ. ಇಲ್ಲಿ ಒಂದು ಕಡೆ 3500 ವರ್ಷ ಹಳೆಯದಾದ ಮಾವಿನ ಮರ ಇದೆ. ಆದರೆ ಈಗ ಕಾಣುವುದು ಒಂದು ಚಿಕ್ಕ ಮರ. ಇದರಡಿಯಲ್ಲಿ ಕಾಮಾಕ್ಷಿ ದೇವಿ ಶಿವನಿಗಾಗಿ ತಪಸ್ಸು ಮಾಡಿದ್ದಳೆಂದು ಪ್ರತೀತಿ.

ನಾವು ಒಂದು ಸುತ್ತು ಬಂದು, ಒಳಗೆ ಹೋದೆವು. ಎಲ್ಲೆಡೆಗಳಿಗಿಂತ ಬೇರೆಯೇ ತೆರನಾದ ಶಿವಲಿಂಗ ಇಲ್ಲಿದೆ. ಸುಮಾರು 3 ಅಡಿ ಎತ್ತರವಾಗಿದ್ದು ಸಪೂರವಾಗಿ ಮೇಲೆ ಹೋದಂತೆ ಚೂಪಾಗಿದೆ. ಇಲ್ಲಿ ಸ್ವಲ್ಪ ರಶ್ ಇತ್ತು. ಆದರೂ ಹೆಚ್ಚು ಕಾಯದೆ ದೇವರನ್ನು ನೋಡಿ ಪ್ರಸಾದ ಪಡೆದು ಹೊರಬಂದೆವು. ಘಂಟೆ 11.30. ಕಾಫಿ ಕುಡಿದು ರೀಚಾರ್ಜ್ ಮಾಡಿಕೊಂಡೆವು. ಹೊಸ ಹುರುಪಿನಿಂದ ನಾವು ಆಟೋ ಮಾಡಿಕೊಂಡು ಕೈಲಾಸನಾಥ ದೇವಾಲಯ ನೊಡಲು ಹೋದೆವು. ಸುಮಾರು 2 ಕಿ.ಮಿ ದೂರ ಅಷ್ಟೆ.

6 ನೇ ಶತಮಾನದ ಈ ದೇವಾಲಯವು ಪಲ್ಲವ ರಾಜ ನರಸಿಂಹವರ್ಮನ್ ನಿರ್ಮಿಸಿದ್ದನಂತೆ. ಈತನ ಹೆಸರಿಗನುಗುಣವಾಗಿ ಇಲ್ಲಿ ಎಲ್ಲಿ ನೋಡಿದರೂ ಸಿಂಹ ಮೂರ್ತಿಗಳೇ ಕಾಣುತ್ತವೆ.

 ಇದು ಈಗ ಪ್ರಾಕ್ತನ ಇಲಾಖೆಗೆ ಒಳಪಟ್ಟಿದೆ. ಸುತ್ತಲೂ ಸುಂದರ ಉದ್ಯಾನ ಬೆಳೆಸಿದ್ದಾರೆ. ನಾವು ದೇವಾಲಯಕ್ಕೆ ಒಂದು ಸುತ್ತು ಬಂದೆವು. ಅಲ್ಲಲ್ಲಿ ದೊಡ್ಡ ದೊಡ್ಡ ಸಿಂಹಗಳು ಬಾಯ್ದೆರೆದು ನಮ್ಮನ್ನು ನೋಡುತ್ತಿವೆ. ಕಾಲನ ಹೊಡೆತದಿಂದ ಬಹಳಷ್ಟು ಹಾನಿಗೀಡಾಗಿದೆ. ಅಲ್ಲಲ್ಲಿ ದುರಸ್ತಿ ಮಾಡಿದ್ದರೂ ವಿರೂಪಗೊಂಡಿವೆ.

 ಎದುರುಗಡೆ ವಿಸ್ತಾರವಾದ ಹುಲ್ಲುಹಾಸು, ಒಂದು ಪಕ್ಕದಲ್ಲಿ ನಂದಿ ಮಂಟಪವಿದೆ.

 ದೇವಾಲಯದ ಮುಂಭಾಗದಲ್ಲಿ ಹಲವಾರು ಪುಟ್ಟ ಗುಡಿಗಳಿವೆ ಮತ್ತು ಕೋಷ್ಟಕಗಳಿದ್ದು ಅದರಲ್ಲಿ ಶಿವಲಿಂಗಗಳಿವೆ.

 ಅಲ್ಲಿರುವ ಒಂದು ಬಾಗಿಲಿನಿಂದ ಒಳ ಹೋದರೆ ಒಂದು ಗುಡಿ ಎದುರಾಗುತ್ತದೆ. ಇದರ ಬಾಗಿಲು ಮುಚ್ಚಿದ್ದರು. ಒಳಗಡೆ ಯಾವ ದೇವರು ಎಂದು ತಿಳಿಯಲಿಲ್ಲ. ಬಹುಶಃ ಪಾರ್ವತಿಯ ದೇಗುಲವಿರಬೇಕು. ಅಲ್ಲಿ 2 ದ್ವಾರಪಾಲಕರ ಮೂರ್ತಿಗಳಿದ್ದವು. ಇವುಗಳನ್ನು ನವೀಕರಿಸಿದ್ದಾರೆ.

 ಒಳಾಂಗಣದ ಭಿತ್ತಿಯಲ್ಲಿ ಸಾಲು ಸಾಲು ಕಂಭಗಳು, ಎಲ್ಲೆಲ್ಲು ನೋಡಿದರೂ ಸಿಂಹಗಳು! ಬೇರಾವ ದೇವಾಲಯಗಳಲ್ಲಿ ಕಂಡುಬರದ ವಿಶಿಷ್ಟ ಶೈಲಿ.

ಮಧ್ಯದಲ್ಲಿ ಕೈಲಾಸನಾಥನ ಆಲಯ. ಶಿಖರವು ಸಾಧಾರಣ ಉನ್ನತಿ ಹೊಂದಿದೆ. ಒಳಗಡೆ ಕರಿಶಿಲೆಯಲ್ಲಿ ಕೆತ್ತಿದ ದೊಡ್ಡ ಶಿವಲಿಂಗ. ಬಹಳ ಸುಂದರವಾಗಿದೆ. ಇಲ್ಲೇ ಪಕ್ಕದ ಗೋಡೆಗೆ ಒರಗಿಸಿರುವ ಭಿನ್ನವಾಗಿರುವ ಬಹಳ ದೊಡ್ಡ ಪಾಣಿ ಪೀಠ ಒಂದನ್ನು ಇರಿಸಿದ್ದಾರೆ. ಇದು ಮುರುಕಲು ಆದ್ದರಿಂದ ಪೂಜೆಗೆ ಯೋಗ್ಯವಲ್ಲ. ಅದರ ಗಾತ್ರ ನೋಡಿಯೇ ಅಚ್ಚರಿಪಡಬೇಕು. 1500 ವರ್ಷಗಳಿಂದ ಮಳೆ, ಗಾಳಿ ಮತ್ತು ಬಿಸಿಲಿನ ಹೊಡೆತದಿಂದ ಹಾನಿಯಾಗಿದ್ದರೂ ಸ್ವಲ್ಪ ದೂರ ನಿಂತು ವೀಕ್ಷಿಸಿದರೆ, ವಾಹ್! ಎಷ್ಟು ಸುಂದರ! ಎನಿಸುತ್ತದೆ.

 ಇಲ್ಲಿಗೆ ಬಹಳ ಜನ ವಿದೇಶೀ ಯಾತ್ರಿಕರು ಬರುತ್ತಾರೆ. ನಾವಿರುವಾಗ ಜರ್ಮನಿಯಂದ ಬಂದಿರುವ ಹಲವರಿದ್ದರು.

ಈವಾಗ ಘಂಟೆ 12-45. ಊಟಕ್ಕೆ ಮೊದಲು ಇನ್ನೂ ಒಂದು ದೇವಸ್ಠಾನ ನೋಡಿಬಿಡೋಣ ಎಂದು ಕರ್ಛಪೇಶ್ವರ ದೇವಾಲಯದ ಕಡೆಗೆ ಹೋದೆವು. ಇದು ಸಹಾ ಶಿವ ಕ್ಷೇತ್ರ. ಇಲ್ಲಿ ಮಹಾವಿಷ್ಣು ಕೂರ್ಮಾವತಾರದಲ್ಲಿ ಶಿವನನ್ನು ಪೂಜಿಸಿದ್ದನಂತೆ.

 ಕರ್ಛಪ ಎಂದರೆ ಕೂರ್ಮ ಅಥವಾ ಆಮೆ. ಹಾಗಾಗಿ ಇದಕ್ಕೆ ಈ ಹೆಸರು. ಸಾಕಷ್ಟು ವಿಶಾಲವಾಗಿದೆ. ಒಂದು ದೊಡ್ಡ ಕಲ್ಯಾಣಿ ಇದೆ.

 ಈ ದೇವಾಲಯವನ್ನು ರಾಜ ರಾಜ ಚೋಳ ನಿರ್ಮಿಸಿದ್ದನಂತೆ. ಶಿವಲಿಂಗವು ಏಕಾಂಬರನಾಥ ಲಿಂಗದಂತೆಯೇ ಇದೆ. ಅಲ್ಲಿ ನಮಿಸಿ ಹೊರಬಂದೆವು. ಕಲ್ಯಾಣಿಗೆ ಒಂದು ಸುತ್ತು ಬಂದೆವು. ಒಂದೆಡೆ ದೊಡ್ಡ ಅಶ್ವತ್ಥ ಮರವಿದೆ. ಅದರ ಕೆಳಗಡೆ ನೂರಾರು ನಾಗ ಕಲ್ಲುಗಳು. ಪ್ರಶಾಂತ ಜಾಗ.

ಬೇಗನೇ ಹೊಟೆಲ್ ಗೆ ಹೋಗಿ ಊಟ ಮುಗಿಸಿದೆವು. ಅಲ್ಲಿಂದ ಒಂದು ಸೀರೆ ಮಳಿಗೆಗೆ ಬಂದೆವು. ನಮಗೆ ಬೇಕಾದ 4-5 ರೇಶ್ಮೆ ಸೀರೆ ಮತ್ತು ಇತರ ಸಾದಾ ಸೀರೆಗಳನ್ನು ಕೊಂಡೆವು. ಇಲ್ಲಿ ರೇಷ್ಮೆ ಸೀರೆ ಬಹಳ ಅಗ್ಗ. ಬೆಂಗಳೂರಿಗಿಂತ 1/3 ಕಡಿಮೆ ಬೆಲೆ.

 ಇನ್ನೊಂದು ಮುಖ್ಯ ದೇವಾಲಯ ಬಾಕಿ ಇದೆ. ಅದುವೇ ವರದರಾಜ ಪೆರುಮಾಳ್ ದೇವಾಲಯ. ಒಂದು ಆಟೋದಲ್ಲಿ ಅಲ್ಲಿಗೆ ತಲುಪಿದಾಗ 4 ಘಂಟೆ. ಎದುರಿಗೆ ಉನ್ನತವಾದ ಭವ್ಯ ರಾಜಗೋಪುರ,

 ಅದನ್ನು ದಾಟಿ ಒಳಗಡೆ ಹೋದರೆ ವ್ಯತ್ಯಸ್ಠವಾದ ಒಂದು ಮಂಟಪ ಕಾಣುತ್ತದೆ. ಎತ್ತರವಾದ 4 ಕಂಭಗಳು ಅದರ ಮೇಲೊಂದು ಶಿಖರ. ಇಂತಹದೊಂದು ಬೇರೆಲ್ಲೂ ನೊಡಿಲ್ಲ ನಾವು. 

ಇದೇ ತರಹದ್ದು ಇನ್ನೊಂದು ಮಂಟಪ ಇದರ ಸ್ವಲ್ಪ ಮುಂದೆ ಇದೆ. ಒಂದು ಪಕ್ಕದಲ್ಲಿ ಶಿಲ್ಪಕಲೆಗಳಿಂದ ಅಲಂಕಾರಗೊಂಡ ಶತ ಕಂಭಗಳಿಂದ ಕೂಡಿದ ಮಂಟಪವಿದೆ. ಇದರಲ್ಲಿನ ಕೆತ್ತನೆಗಳು ಬಹಳ ಸುಂದರವಾಗಿದೆ. ಇದು ವಿಜಯನಗರ ಕಾಲದ್ದು. ಆದರೆ ಇದರ ಸುತ್ತಲೂ ಕಬ್ಬಿಣದ ಬೇಲಿ ರಚಿಸಿ ಅಂದಗೆಡಿಸಿದ್ದಾರೆ.

 ನಾವು ಅದರ ಪಾವಟಿಗೆಯಲ್ಲಿ ಕುಳಿತು ವಿಶ್ರಮಿಸಿದೆವು. ಚೋಳರ ಕಾಲದ ಈ ದೇವಾಲಯವು ವಿಜಯನಗರ ಅರಸರಿಂದ ಇನ್ನೂ ಹೆಚ್ಚಿನ ಉನ್ನತಿಗೊಂಡಿತು. ನಾವು ದೇವಳದ ಒಳಗಡೆ ಹೋದೆವು. ಇಲ್ಲಿ ವರದರಾಜ ಸ್ವಾಮಿಯ ದಿವ್ಯ ದರ್ಶನವಾಯಿತು. ಅಲ್ಲಿಂದ ಹಿಂಭಾಗಕ್ಕೆ ತೆರಳಿ ಮೆಟ್ಟಲುಗಳನ್ನು ಏರಿ ಇಲ್ಲಿನ ವಿಶೇಷತೆಯಾದ ಹಲ್ಲಿಗಳನ್ನು ನೋಡಲು ಹೋದೆವು. ಒಂದೆಡೆ ಮೇಲೆ ಛಾವಣಿಯಲ್ಲಿ ದೊಡ್ಡದಾದ 2 ಹಲ್ಲಿಗಳನ್ನು ಕೆತ್ತಿದ್ದಾರೆ. ಇದಕ್ಕೆ ಚಿನ್ನ ಹಾಗೂ ಬೆಳ್ಳಿಯ ಲೇಪನ ಮಾಡಿದ್ದಾರೆ. ಇವುಗಳನ್ನು ಸ್ಪರ್ಶಿಸಿದರೆ ಹಲ್ಲಿ ದೋಷ ಪರಿಹಾರವಾಗುತ್ತದಂತೆ. ನಾವು ಈವರೆಗೆ ಹಲ್ಲಿಗಳಿಗೆ ಯಾವ ತೊಂದರೆಯೂ ಮಾಡಿಲ್ಲವಾದರೂ ಅವುಗಳನ್ನು ಮುಟ್ಟಿ ಬಂದೆವು. ಇಲ್ಲಿನ ಪಾವಟಿಕೆಗಳಲ್ಲಿ ವಿಜಯನಗರ ಅರಸರ ಹೆಸರುಗಳನ್ನು ಕನ್ನಡ ಅಕ್ಷರದಲ್ಲಿ ಕೊರೆದಿದ್ದಾರೆ. ಹೊರಗಡೆ ಬಹಳ ರುಚಿಕರವಾದ ಪ್ರಸಾದ ಮಾರುತಿದ್ದರು. ಒಂದು ಪಕ್ಕದಲ್ಲಿ ವಿಸ್ತಾರವಾದ ಕಲ್ಯಾಣಿ ಇದೆ.

 ಈ ದೇವಾಲಯ ಸಂಕೀರ್ಣವು ಸುಮಾರು 23 ಎಕ್ರೆ ವಿಶಾಲವಾಗಿದೆಯಂತೆ. ಈ ಪ್ರದೇಶವನ್ನು ವಿಷ್ಣು ಕಂಚಿ ಎಂದರೆ, ಏಕಾಂಬರನಾಥ ಪ್ರದೇಶವನ್ನು ಶಿವ ಕಂಚಿ ಎಂದು ಕರೆಯುತ್ತಾರೆ.

ಇಲ್ಲಿಂದ ಹೊರಟು ನಾವು ಮತ್ತೆ ಏಕಾಂಬರನಾಥ ಅಥವಾ ಪೆರಿಯ ಕೊಯಿಲ್ ಗೆ ಹೋದೆವು. ತುಂಬಾ ಸುಸ್ತು. ಅಲ್ಲೇ ಮುಖ ಮಂಟಪದಲ್ಲಿ ವಿರಮಿಸಿದೆವು. ಮಗದೊಮ್ಮೆ ದೇವರನ್ನು ನೋಡಿ ಬಂದೆವು. ಪಲ್ಲಕಿ ಉತ್ಸವ ನಡೆಯುತಿತ್ತು. ವಿತರಣೆಯಾಗುತಿದ್ದ ಪುಳಿಯೋಗರೆ ಪ್ರಸಾದ ಪಡೆದು ಹೊರಟೆವು. ಈ ಊರಲ್ಲಿ ಇನ್ನೂ ಹಲವಾರು ದೇವಾಲಯಗಳಿವೆಯಂತೆ. ಅವುಗಳನ್ನೆಲ್ಲಾ ನೋಡಲು ಇನ್ನೊಂದು ದಿನ ಬೇಕು. ಕಾಂಚಿ ಮಠ ಮತ್ತು ಕುಮರಕೋಟ್ಟಂ ನೋಡಲು ಸಮಯವಿರಲಿಲ್ಲ.

ಹೋಟೆಲ್ ನಲ್ಲಿ ದೋಸೆ ತಿಂದು ಬಸ್ ನಿಲ್ದಾಣಕ್ಕೆ ಬಂದು ಆರ್ಕೋಣಂ ಬಸ್ ಹತ್ತಿದೆವು. ರಾತ್ರಿ 10 ಘಂಟೆಗೆ ಆರ್ಕೋಣಂ ರೈಲ್ ನಿಲ್ದಾಣ ಸೇರಿದೆವು. ನಮ್ಮ ರೈಲು ಚೆನ್ನೈ ಬೆಂಗಳೂರು ಮೈಲ್ ರಾತ್ರಿ 12-15 ಕ್ಕೆ ಬಂತು. ಬೆಳಗ್ಗೆ 6 ಘಂಟೆಗೆ ಬೆಂಗಳೂರು, 7ಕ್ಕೆ ಮನೆಗೆ ತಲುಪಿದೆವು. ಮನಸ್ಸಿಗೆ ಬಹಳ ಆನಂದವಾದ ಒಂದು ಯಾತ್ರೆಯಾಗಿತ್ತು.